Honnodd Mrs A pe bai ei mab, Mr B, wedi cael sganiau, ei asesu ac ymchwiliad priodol yn dilyn ei dderbyn i’r ysbyty ym mis Gorffennaf ac Awst 2023, y byddai ei diwmor ar yr ymennydd wedi’i ganfod yn gynharach, gan alluogi i’w driniaeth ddechrau’n gynharach. Roedd yr ymchwiliad yn canolbwyntio’n benodol ar ganfod a oedd safon ei reolaeth glinigol Mr B rhwng Gorffennaf a Medi 2023 yn dderbyniol.
Canfu’r Ombwdsmon fod safon rheolaeth glinigol Mr B rhwng Gorffennaf a Medi 2023 yn dderbyniol ac ni chadarnhawyd y gŵyn.
O ran ei bresenoldeb yn yr Adran Frys a’i dderbyn i’r ysbyty ym mis Gorffennaf, canfu’r Ombwdsmon fod yr ymchwiliad a gynhaliwyd yn ystod ymweliad Mr B â’r Adran Frys yn briodol yn seiliedig ar ei gyflwyniad ac yn cydymffurfio â’r canllaw cenedlaethol. Ar adeg ei dderbyn ym mis Gorffennaf, roedd rheolaeth Mr B unwaith eto’n cydymffurfio â’r canllaw cenedlaethol ac o safon glinigol dderbyniol, a hefyd y penderfyniad i ofyn am sgan MRI ac adolygiad niwrolegol fel claf allanol.
Roedd y Bwrdd Iechyd eisoes wedi derbyn diffyg am nad oedd yr atgyfeiriad ar gyfer sgan MRI wedi digwydd. Fodd bynnag, er gwaethaf hyn, cafodd Mr B sgan MRI arall 4 wythnos ar ôl iddo gael ei rhyddhau ac a oedd o fewn yr amserlen sy’n cael ei hargymell.
Wrth edrych ar dderbyniad Mr B i’r Adran Frys ym mis Awst ac wedi hynny, roedd oedi byr ym mrysbennu’r Adran Frys, a chanfu’r Ombwdsmon na fyddai hyn wedi newid sut y cafodd Mr B ei reoli. O ran ei dderbyn i’r ysbyty, cafodd Mr B nifer o archwiliadau a sganiau, ac roedd ei reolaeth wedi dilyn y prif argymhellion a nodir yn y canllawiau strôc cenedlaethol. Hefyd, pan ddangosodd sgan CT ym mis Awst waedlif mewngreuanol heb achos clir, cynhaliwyd rhagor o sganiau i ganfod achos gwaedlif Mr B, a oedd yn glinigol briodol, ac felly hefyd y cynllun i drefnu sgan dilynol ymhen 3 mis.